AXCP sədri Əli Kərimli prezident seçkiləri gününün 1 həftə irəli çəkilərək 9 oktyabra təyin edilməsinə münasibət bildirib. Əli Kərimli rəsmi Facebook səhifəsində yazıb:
“MSK prezident seçkisini 9 oktyabra təyin edib. Seçkini 1 həftə əvvələ çəkməkdə məqsəd Milli Şuranın vahid namizədi Rüstəm İbrahimbəyovun seçkilərdə iştirakını daha da çətınləşdirməkdir. Bilirlər ki, Rüstəm bəyin Rusiya vətəndaşlığından imtinası müəyyən qədər vaxt aparır. “Bəlkə o vaxta qədər Rüstəm bəy sənədlərini qaydaya sala bilmədi” ümidi ilə seçkini tezləşdirirlər. Rəsmən etiraf edirlər ki, ədalətli yarışdan qorxurlar. Bəs hanı 600 min nəfərlik YAP? Bəs deyirdilər ki, İlham Əliyevin reytinqi 90%-dən yuxarıdır? İndi rəqiblə yarışmamaq üçün bütün hiylələrə əl atırlar. Deməli, bütün tərif və məddahlıq kompaniyasına baxmayaraq xalq arasında qeyri-populyar olduğunu İlham Əliyev özü də bilir”.
