“Qüds hansısa qondarma rejimin paytaxtı olaraq tanına bilməz” – Tale Bağırzadə
“Qüds hansısa qondarma rejimin paytaxtı olaraq tanına bilməz” – bu sözləri həbsdə olan ilahiyyatçı Tale Bağırzadə deyib.
Qobsutan həbsxanasında saxlanılan Müsəlman Birliyi Hərəkatının sədri Tale Bağırzadə dekabrın 11-i ailəsi ilə əlaqə saxlayıb. O, telefon danışığında Qüds probleminə görə narahatlığını ifadə edərək, öz münasibətini bildirib. Bu barədə Rakurs TV-ə ilahiyyatçının yaxınları məlumat verib. Onların sözlərinə görə, ilahiyyatçı telefon danışığında bu fikirləri səsləndirib:
“Qüds tək müsəlmanlar üçün deyil, xristianlar və yəhudilər üçün də müqəddəs şəhərdir. Üç səmavi dinin ortaq dəyəridir. Belə bir şəhər hansısa qondarma rejimin paytaxtı, ərazisi olaraq tanına bilməz. Sionist rejimin mahiyyəti ilə işğalçı Ermənistan rejiminin mahiyyəti eynidir. Qüds və Qarabağ da eyni problemin müxtəlif versiyasıdır. Bunu bilmək lazımdır ki, Yaxın Şərqdə İsrail, Qafqazda Ermənistan öz işğalçı siyasətindən əl çəkməyincə sabitlik olmayacaq. Buna görə, Azərbaycan müsəlmanları Qüds problemin daha yaxşı anlayır. Biz heç zaman nə Qarabağın Ermənistan, nə də Qüdsün İsrailin ərazisi olması ilə barışmayacayıq. ABŞ prezidenti bu qərarı ilə özü də bilmədən müsəlmanlar arasında vəhdətin, birliyin güclənməsi üçün fürsət yaratmış oldu. Bir neçə gün əvvəl İslam Peyğəmbərinin mövludu münasibəti ilə “Vəhdət həftəsi”n qeyd edirdik, indi isə bu vəhdəti sərgiləmək üçün imkan yarandı. İndi birləşməyin və müsəlmanların bütün qəzəblərini İsrail rejiminə qarşı yönəltməyinin zamanıdır”
2015-ci il noyabrın 26-da Baş Mütəşəkkil Cinayətkarlıqla Mübarizə İdarəsinin Bakının Nardaran qəsəbəsində keçirdiyi əməliyyatda ikisi polis olmaqla, 6 nəfər həlak olub. Rəsmi ittihama görə, radikal silahlı dəstə polis əməkdaşlarına silahlı müqavimət göstərib və ölüm hadisələri bu qarşıdurmada baş verib.
Üç qrupa ayrılan cinayət işi Bakı Ağır Cinayətlər Məhkəməsinə göndərilib.
