Almaniya hakimiyyətinin ölkədən qovduğu Azərbaycan ailəsinə Fransa sığınacaq verib.
Qəzetin yazdığına görə, Cümşüdovlar cütlüyü və onların 2, 7, 11 yaşlarında olan üç uşağı Fransanın qərbindəki Brest şəhərinə mayın əvvəlində gəliblər. Onlar Azərbaycanı tərk etdikdən sonra son iki ili Almaniyada yaşayıblar. Amma Almaniyanın hakimiyyət dairələri onlara sığınacaq verməkdən imtina edib. Bu səbəbdən də ailə Fransaya sığınmaq məcburiyyətində qalıb.
“İnsan hüquqları Liqası” və Restos du Coeur xeyriyyə təşkilatları bu Azərbaycan ailəsinin taleyi ilə maraqlanıblar. Onlar Kemperle qəsəbəsi başçısının bu immiqrant ailəyə münasibətindən hiddətləniblər və onun problemlərini özləri həll ediblər.
Qəzet yazır ki, mayın 21-də məhz xeyriyyə təşkilatlarının köməyi ilə Cümşüdovlar ailəsi Fransada sığınacaq almaq üçün ərizə veriblər. Bu gündən etibarən isə bu ailə köçkünlərin qəbulu və yardım göstərilməsi üzrə xüsusi proqrama daxil edilib və qaçqınlar üçün sığınacağa yerləşdirilib.
