“Cihad nigahı” termini ilə cəmi 2 ildir ki, tanışıq. Bu iki müqəddəs sözə İslam şəriətində böyük önəm verilir. Belə ki, İslam terminologiyasında “Cihad” deyərkən, daxili (nəfslə mübarizə, əxlaq elmində buna böyük cihad deyilir) və xarici düşmənlə (vətən və din uğurunda döyüş və İlahinin Qurani-Kərimdə yalnız onlar üçün söylədiyi, “onlara ölü deməyin, ölü sizsiz, onlar mənim yanımda ruzi yeyirlər”) mübarizə başa düşülür. ”Nigah” kəlməsini isə tanımayan və müəyyən yaş həddinə çatdıqdan sonra bu mərhələni keçməyən kimsə az tapılar. Amma “cihad nigahını” necə? Bu sözü nə vaxtdan eşidirik? Biz bir İslam ümməti olaraq nə vaxtsa belə bir mərasim keçirmişikmi? Yəni istənilən hər hansı İslam məzhəbində belə bir fiqhi terminə rast gəlmişikmi? Təbii ki, cavabın bir mənalı olaraq “xeyr” kəlməsindən ibarət olacağı heç də şübhə doğurmur. Doğulacaq uşağın adı olan kimi, təbii ki, adı da doğuracaq səbəblər vardır.
“Cihad nigahı” termininin yaranmasına səbəb Suriyada, ordu və Amerikanın, Türkiyənin və bəzi ərəb dövlətlərinin himayəsi altında birləşən terrorçu qruplaşmalar arasında gedən müharibədir. “Cihad nigahı” termini Suriyada gedən döyüşlər zamanı bəzi dünya və axirətdə kor olan, həqiqətdə İslama deyil, məhz Amerikanın maraqlarına xidmət edən Səudiyyə “şeyx”lərinin dilindən cari oldu. Belə ki, Suriyada Bəşər Əsədə qarşı vuruşan muzdlu sələfilər döyüşlərdən yorulmasınlar deyə orada yaşayan dinc əhalinin malını, canını və xüsusən də “cihad nigahı” adı ilə namusunu onlara halal bildilər. Bunu da qeyd edim ki, “Cihad nigahı ” yalnız muzdlu sələfilərin qarət etdiyi dinc Suriya qadınlarına deyil, hətta digər ölkələrdə yaşayan sələfi qadınlara da aiddir. Belə ki, onlar Suriyaya gələrək özlərini Əsədə qarşı vuruşan sələfilərin xidmətində qoyaraq “cənnət”i əldə edə bilirlər.
Yeri gəlmişkən, “cihad nigahı”na girən qadın konkret olaraq bir vuruşan sələfinin deyil, əksinə orada vuruşan bütün sələfilərin xidmətində durmalıdır. Mən ilk dəfə bu fətvanı eşidəndə, Peyğəmbərimizin Ühüd döyüşünü xatırladım. Çünki o döyüşə Məkkə müşrüklərinə başçılıq edən əbu-Sufyanın göstərişi ilə çoxlu ərəb rəqqasələri və müşrük döyüşçüləri əyləndirəcək əxlaqsız qadınlar gətirmişdilər. Bu hala ərəb müharibələrində çox rast gəlmək olur. Döyüşçülər səhərə kimi o qadınlarla eyş-işrət içində olurdular ki, sabahın döyüş qorxusunu dəf edə bilsinlər. Burada müşriklərin bu çirkin əmələ əl atmaları elə də təəccüb doğurmur. Amma sələfi “alim”lərinin belə bir fətva vermələri təbii ki, dinin deyil, şəxsi maraqlardan xəbər verir. Görəsən Səudun ərəb alimləri, ərəb dilində olan Quranı bir dəfə də olsun oxumayıblar? Axı Qurani-Kərimdə nigah və təlaq haqqında Allah Taala möhkəm ayələr vasitəsi ilə konkret olaraq şərtlər qoymuşdur. O cümlədən Allah Taala nigahın ilk şərti olaraq kəbin duasını bizlərə vacib buyurur:
Siz onu necə geri ala bilərsiniz ki, (vaxtilə) bir-birinizlə yaxınlıq etmişdiniz və onlar (qadınlarınız) sizdən möhkəm əhd-peyman almışdılar. (Nisa 21)
Ayədəki “əhd-peyman” sözündən məqsəd kəbin duasıdır. Yəni naməhrəm qadınla kişinin arasında ər-arvad münasibətlərinin baş tutması üçün kəbin duası zəruridir. Növbəti şərt isə qadının heç bir kişinin əqdində olmaması və təlaq aldığı kişidən iddə müddətinin buyrulduğu vaxtdan keçməsidir. Belə ki, qadın ya subay olmalı, ya da ərindən talaq (boşanma) alandan sonra 3- 4 ay müddətində gözləməlidir. Əks halda oxunan nigah duası batil və istənilən münasibət də zina sayılacaqdır.
Allah Taala Qurani kərimdə bu barədə buyurur:
(Bu müddəti gözləyən) qadınlara elçi göndərmək (onlarla evlənmək) istədiyinizi (rəmz və) işarə ilə bildirməkdən və ya belə bir istəyi ürəyinizdə gizlətməkdən sizə heç bir günah gəlməz. Allah sizin onları xatırlayacağınızı bilir. Lakin (gözləmə müddətində) onlarla gizlində vədələşməyin, onlara şəriətə müvafiq söz deyin! Gözləmə vaxtları bitməyincəyə qədər onlarla nikah etmək fikrində olmayın! və ya boşanmış qadınlar haqqında buyurur:
Boşanmış qadınların gözləmə müddətləri bitərkən aralarında barışıq və yaxşılıqla yaşamağa razılıq olduğu zaman onların təkrar öz ərlərinə nikah edilməsinə mane olmayın!
Yuxarıda qeyd etdiyimiz ayələrdən məlum olur ki, bir qadın öz ərindən boşanarsa və ya bir nəfərlər şəriət baxımından ər-arvad münasibətində olarsa müəyyən bir müddət keçməmiş ayrısı ilə bu münasibətdə ola bilməz. Deməli, “cihad nigahı”nın heç bir şəri dəlili yoxdur. Sadəcə Səud “alim”ləri bu və ya digər buna bənzər fətvalarla bir daha İslam ümmətində yeni fəsadların baş verməsinə səbəb olurlar. Yəni muzdlu terroçuları “cihad nigahı”na deyil, “cihad zina”sına dəvət edirlər. Əlbəttə körpəyə belə rəhm etməyib onun özünün və ya valideynlərinin başını kəsən bir vəhhabi üçün zina və ya digər günahlar önəmli deyil. Sadəcə bunu bilməyənlərə izah etməyə çalışdım ki, Səudiyyə və ya onların fətvaları ilə oturub-duranlar üçün din anlamı, Quran anlamı yoxdur. Bu gün Azərbaycanda da yaşayan əksər sələfilər bu əqidədədirlər. Onlar heç olmasa gözlərini açıb axirətləri haqqında düşünsünlər. Düşünsünlər ki, heç yerdə əsirin başını məzlumcasına kəsmək, suyun yolunu bağlamaq, günahsız körpələri divara mismarlamaq bizim dinimizdə yoxdur. Dinimiz daim kişi olaraq vuruşmağı bizdən tələb edib. Çarəsizlərin başını kəsmək, dağdan yuvarlatmaq, kəsilən başlarla futbol oynamaq dinin adına yazılan namərdlikdir. Dinimiz bizdən meyitə hörmətsizlik etməməyimizi tələb etdiyi halda, siz onunla futbol oynayırsız. İmam Hüseynin (ə) İslam tarixində qızıl hərflərlə yazıdığı sözü bir daha xatırladıram sizə: ”dininiz yoxdursa, heç olmasa kişiiyiniz olsun”.
Gəlin bu namərdliyi Müqəddəs İslam dininin adına yazmayın. Özünüzə qayıdın. Özünüzü və Allahın dinini dünyada məsxərə obyektinə çevirməyin. Axı sizin əməllərin nə hansı dəyərlərə, nə də hər hansı bir dinin göstərişlərinə uyğundur. Allahın salamı olsun haqqı görüb onu qəbul edənlərə.
Emil Rahiloğlu
