İranın Azərbaycan Respublikasındakı səfiri Novosti.az xəbər agentliyi ilə müsahibədə İran və Azərbaycan Respublikası arasında yeni ildə bir neçə müqavilənin imzalanacağını bildirərək deyib: Bu müqavilələr kənd təsərrüfatı məhsulları, qarşılıqlı investisiya, turizm, nəqliyyat, yüklərin tranziti sahələrini özündə ehtiva edəcək və tərəflər onu imzalayacaqlar.
iki ölkə arasındakı müsbət əlaqələrə münasibət bildirən Möhsün Pakayin əlavə edib: Ötən ildə iki ölkə müxtəlif sahələrdə 20 sənədi imzaladı.
İran səfiri iki ölkə münasibətlərini strateji səviyyədə adlandırıb və ikitərəfli münasibətlərin genişləndirilməsi üçün iki ölkə rəhbərlərinin siyasi iradəsinə toxunaraq deyib: Təkcə 2014-cü ildə İran və Azərbaycan prezidentləri 4 dəfə görüşdülər və nazirlər və iki ölkənin digər rəsmiləri arasında 20-dən çox görüş baş tutdu. Azərbaycan Respublikası və İranda ticarət sərgiləri də keçirildi.
İki ölkənin qeyri-neft sektorundakı anlaşmalarının hazırkı həcminin 500 milyon dollardan çox olduğunu bəyan edən Möhsün Pakayin söyləyib: Həyata keçirilən proqramlara əsasən ümid olunur ki, bu rəqəmin 2015-ci ildə ikiqat artımı olacaq.
Azərbaycanlı iş adamlarının İranın azad ticarət zonalarında, o cümlədən Araz, Maku, Ənzəlidə, eləcə də Tehran və Təbriz şəhərərindəki investisiyalarına toxunan səfir bildirib: Onlar Məşhəd şəhərində də otel sektorunda investisiya qoymaq niyyətindədirlər.
“İKi ölkə ötən illərdə iqtisadi, enerji və turizm sektorlarında əməkdaşlıqların genişləndirilməsini diqqət mərkəzində saxlamışlar” -deyə İranın Azərbaycandakı səfiri söyləyib.
Pakayin Azərbaycan, İran və Türkiyə sərhəd komandanlarının gələcəkdə keçiriləcək görüşünə münasibət bildirib: Sərhədçilik səviyyəsində üç ölkənin yaxın əməkdaşlığı stabillik və təhlükəsizliyin təmin olunması istiqamətində regional əməkdaşlıqları sürətləndirəcəkdir və bu məsələ yüksək əhəmiyyət kəsb edir.
O həmçinin Azərbaycan, İran və Türkiyə xarici işlər nazirlərinin aprel və yaxud may ayında İranın şimal şəhərlərindən birində görüşəcəklərini bildirərək deyib: 3 ölkənin iqtisadi nazirləri də yaxın gələcəkdə görüşəcəklər.
İranın Bakıdakı səfiri İranın Cənub Qaz Dəhlizi projesinə qoşulmasına dair sualın cavabında da deyib: İran qaz dəhlizləri və digər regional enerji proyektlərinə qoşulmaq niyyətindədir.
“Biz İranın milli mənafeyinə uyğun olan dəhlizi seçəcəyik” -deyən Pakayinin sözlərinə görə, hal-hazırda bu məsələ İranın diqqət mərkəzindədir.
İki ölkənin hazırda neft və qaz sektorunda yaxından əməkdaşlıq etdiklərini bəyan edən İran səfiri deyib: Gələcəkdə bu münasibətləri genişləndirmək niyyətindəyik.
