Qafqaz.ir xəbər verir ki, İsrailin tanınmış siyasətçisi və sabiq nazirlərindən olan Avigdor Liberman, 27 noyabr gecəsi qüvvəyə minən Livanda atəşkəs razılaşmasını “İsrailin kapitulyasiya aktı” (təslim olmasıdır) adlandırıb.
Bu barədə o, Ynet televiziya kanalına verdiyi müsahibəsində bildirib. “Bu razılaşma, 2018-ci ildə HƏMAS-la bağlanan razılaşmanın tam surətidir: eyni prinsip – Netanyahu qısa müddətli sakitliyi, uzunmüddətli təhlükəsizlik ziyanı qarşılığında alır,” – deyə Liberman qeyd edib.
Libermana görə, onlar İsrail ordusunun xəbərdarlıqlarını nəzərə almırlar və maşın karvanları Cənubi Livana doğru irəliləyir.
“Əgər Hizbullah güclərini artırmağa, yüksək dəqiqliyə sahib silahlar və yeni uçuş aparatları istehsal etməyə davam etsə, İsrail orada hərəkət edə bilməyəcək,” – deyə o əlavə edib.
Liberman həmçinin bildirib ki, Hizbullah öz hərbi potensialını artırmaq və İsraili məhv etmək ideyasından imtina etmədiyi müddətcə, onlarla heç bir razılaşma olmamalıdır.
“Dünən hərbi aviasiya şimal İsraildə bir pilotsuz uçan aparatın ardınca gedirdi. 5-6 ildən sonra Hizbullahın 40.000 belə dronu olacaq. Onlar artıq istehsalını qururlar. İranlılar öz niyyətlərini gizlətmir, onlar yenidən Hizbullahı silahlandıracaq və ona pul verəcəklər,” – deyə Liberman əlavə edib.
NDİ Partiyasının lideri həmçinin vurğulayıb ki, “hökumət 7 oktyabr hadisələrindən heç bir nəticə çıxarmayıb. Tamamilə heç nə… eyni konsepsiya davam edir. Daha da pisi, bu gün “Al-Akhbar” qəzetində, Hizbullahla əlaqəli nəşrdə baş məqalə dərc olunub. Onlar bunu necə görürlər, baxmaq lazımdır. Onlar sadəcə bizlərə istehza edirlər. Deyirlər ki, bu, BMT Təhlükəsizlik Şurasının 1701 nömrəli qətnaməsinin eynisidir.”
Liberman atəşkəs razılaşmasının təsdiqlənməsi prosesini tənqid edib: “Adətən nazirlərə sənəd təqdim edilir ki, tanış olsunlar, oxumalıdırlar, amma oxunmur. Baş nazirin nazirlərə münasibəti – bu, hörmətsizlikdir. O, onları yığıb, 1.5 saat gözlətmişdi, sonra isə bələdiyyə rəhbərləri ilə danışmaq üçün getdi. Bu, həm nazirlərə, həm də bələdiyyə rəhbərlərinə hörmətsizlikdir. Niyə baş nazir bu razılaşmanı açıqlamadı? Nəyi gizlədir? Netanyahu hətta kabinet üzvlərinə sənədin mətnini belə verməyib. O, sadəcə oxuyub və oxuduğu mətni tam oxuyub-oxumadığı da məlum deyil.”
Qəzza sektorundakı vəziyyətdən danışan Liberman qeyd edib: “Yalnız dünən, təəssüf ki, bir daha hərbiçimiz həlak oldu. Sufa kəndinin yaxınlığında səhər saatlarında yenə hava hücumu sirenləri çaldı. Mən cənub və şimaldakı vəziyyətə yanaşmada fərqi anlamıram. Ümumiyyətlə, siyasi maraqlardan başqa heç bir məntiq görmürəm. Baş nazir deyir ki, ehtiyat qüvvələr artıq tükənib və rotasiya aparılmalıdır, amma eyni zamanda xidmətə getməmək haqqında qanun layihəsini təsdiqi gündəmdədir. Bu, ordunu məhv edəcək. Hazırda, İsrail ordusunun kadrlar idarəsinin məlumatına görə, ehtiyatda olan hərbiçilərin 75%-i yığıla bilər, amma bu qanun qəbul edilsə, bu rəqəm 50%-ə enəcək.”
Liberman Netanyahunu “şimal bölgələrinin təhlükəsizliyini cənubda əməliyyatın davam etməsi üçün qurban verməkdə” ittiham edib. O, həmçinin müharibənin başlamasından 14 ay keçməsinə baxmayaraq, şimal bölgələrinin bərpası üçün aydın bir planın olmamasına da diqqət çəkib. “İnsanlar evlərinə qayıda bilmədən əvvəl infrastruktur yaradılmalıdır – elektrik, su təminatı, yollar. Hazırda beş dövlət qurumu bu məsələlərlə məşğuldur, amma artıq bir ildən çox keçib və hələ də plan yoxdur,” – deyə Liberman bildirib.
