Hazırda həbs həyatı yaşayan ruhani Hacı Abgül Süleymanov Aşura münasibətilə məqalə yazıb. İslamazeri.az yazını təqdim edir:
“Bismillahir Rəhmanir Rəhim İnna Lillah və İnna ileyhi raciun… Hər kim desəki İmam Hüseynin (ə) Aşurası şiələrə məxsusdur, o İmam Hüseynin (ə) Aşurasını məhdud edib. Həmçinin, kim desə İmam Hüseynin (ə) Aşurası müsəlmanlara aiddir, o şəxsdə İmam Hüseynin (ə) Aşurasını məhdud edib. Çünki, Aşuranın həqiqəti budur ki, İmam Hüseyn (ə) Aşurası haqqı və azadlığı istəyənlər, zülmə etiraz edənlər üçündür. Əgər dünya müsəlmanları, İmam Hüseyn (ə) Aşurasını dərk etsələr, başa düşsələr vay dünya diktatorlarının, dünya hegemonlarının halına olsun. İmam Hüseynin (ə) Aşurasını insanlara çatdırılmasının qarşısını alanlar bilirlər bunu və hər il yüzlərlə hiylə və təbliğat növü ilə İmam Hüseyn (ə) Aşurasını gözdən salmağa cəhd edirlər. Əlbəttə ki, buna heç vaxt nail olmayıblar və olmayacaqlar. Nə qədərki, Aşura məktəbi başa düşülməyib Fələstin, Qarabağ azad olunmayacaq və işğal altında qalacaq. Aşura azadlıqsevərlər üçündür Çox təəssüflə demək istəyirəm ki, hazırda müsəlmanların əksəriyyəti İmam Hüseynin (ə) Aşurasını başa düşməyiblər. Lakin bəzən müsəlman olmayan biri İmam Hüseynin (ə) qiyamını başa düşür və bir ölkəni azadlığa çıxarmaq istəyərkən, İmam Hüseyni özünə öndər bilir. Buna misal olaraq Hindistanın azadlıq hərəkatının lideri Mahatma Qandini misal gətirmək olar. Onun məhşur cümləsini yada salmaq istəyirəm: “Mən İslamın ən böyük şəhidinin – İmam Hüseynin (ə) həyatını diqqətlə oxumuşam və Kərbəla tarixinin səhifələrinə diqqət yetirmişəm. Mənə aydın olub ki, əgər Hindistan azad bir ölkə olmaq istəyirsə, gərək İmam Hüseyndən (ə) örnək alıb, onun yolu ilə getsin”. Qara bayraq İmam Hüseyn (ə) məclisindən düzgün istifadə etmək lazımdır. İslam düşmənləri yüz nəfəri toplamaq istəyəndə yüz minlərlə pul xərcləyirlərki, sözlərini, fikirlərini onlara çatdırsınlar. Lakin, bizlər bir qara bayraq vurmaqla insanlar bu mərasimlərə özləri cəm olur. Bu məclislərdə Fələstin, İraq, Yəmən, Misir, Suriya və Qarabağ məsələlərinə toxunmaq lazımdır. Çünki, bu gün İmam Hüseyn (ə) olsa o Həzrət də, bu məsələlərə toxunardı. İmam Hüseyn (ə) zülmə hayqıran öndər… İmam Hüseyn (ə) İraqa gedərkən yolda Beyzə adlı bir məntəqədə Hürrün qoşunu ilə üz-üzə gəldi. İmam (ə) üzünü Hürrün qoşununa tutub bir xütbə söylədi və xütbədə öz inqilabının səbəbini belə açıqladı: Camaat, Allahın Peyğəmbəri (s) buyurmuşdur: “Kim Allahın haramını halal edən, Allahın əhdini sındıran, Peyğəmbərin (s) qanun və sünnəsinə müxalif olub Allahın bəndələri arasında günah, fəsad və düşmənçilik edən bir hökmdarla üzləşsə və bu cür bir hökmdara qarşı əməli, hərəkəti və ya sözü ilə etiraz etməsə, Allah sükut edən həmin şəxsi o hökmdarın düçar olacağı əzaba (cəhənnəm əzabına) düçar edər.” Əziz Peyğəmbərimizdən (ə) nəql olunan hədis səbəb oldu ki, İmam Hüseyn (ə) Kərbəlaya gəlib pak qanına boyandı. İmam (ə) buyurur: “Mən ölümü səadət, zalımlarla yaşamağı isə alçaqlıqdan başqa bir şey bilmirəm.” Bu gün çoxları deyir ki, biz Əhli-Beytdənik. Əhli-Beyt deyir ki, “zillətə razı olan biz Əhli-Beytdən deyil.” Allaha pənah aparıram, bir ömür sinə, zəncir vurasan, İmam Hüseynə (ə) ağlayasan, amma zülmə etiraz etmədiyinə görə Məhşərə Yezid kimisi ilə gələsən. Kim kimə tabe olsa, Məhşərə də onunla gələcək… Abgül Süleymanov”
