Ceyş əl-İslamın komandirlərindən biri və şəriət məhkəməsininin səlahiyyətlisi Zeynəl Abidin Suriyadan çıxaraq Türkiyənin İstanbul şəhərinə gedib. Bu barədə araşdırmaçı Fadi Hüseyn özünün Tvitter hesabında xəbər verib. Onun paylaşdığı fotolardan aydın olur ki, terrorbaşı İstanbulda saqqalını qırxaraq imicində dəyişiklik edib.
Yeri gəlmişkən qeyd edək ki, Ceyş əl-İslam terror qruplaşmasının silahlılarının Dəməşqin cənub məhəllələrindən, o cümlədən Muhəyyəm əl-Yərmukdan çıxarılması davam edir.
Bildirilir ki, silahlıların və ailə üzvlərinin çıxarılması Suriyada Düşmən Tərəflərin Barışdırılması üzrə Rusiya Mərkəzi ilə gəlinən razılıq əsasında həyata keçirilir. Ekstremistlər öz silahlarını və şəhərin bu yerindəki döyüş mövqelərini Suriyanın qanuni hökumətinə təhvil verirlər.
Dəməşqin cənub məhəllələrinin bir qismi hələ də İŞİD və «Ən Nursa» terror təşkilatının nəzarətində qalıb. Rusiya Müdafiə Nazirliyinin məlumatına görə hazırda Muhəyyəm əl-Yərmuk rayonunun 65 faizi terrorçulardan azad edilərək Suriya qoşunlarının nəzarətinə keçib.
